Nürəddin Novruzov dünya çempionatında 5-ci oldu

Oktyabr 31, 2024

Albaniyanın paytaxtı Tiranada keçirilən güləş üzrə dünya çempionatına yekun vurulub.

Son iki gündə mundialda sərbəst güləşçilər mübarizə aparıb.

Nürəddin Novruzov (61 kq) debütdə türkiyəli Ahmet Dumanla bacarmayıb – 4:14. Rəqib finala yüksəldiyi üçün güləşçimiz təsəlliverici görüşlərə çıxıb. Novruzov həm Kosta-Rika təmsilçisi Peter Kudeyə (14:4), həm də Puerto-Riko idmançısı Jozef Silvaya (17:6) tam üstünlüklə qalib gəlib. Nürəddin bürünc medal uğrunda qarşılaşmada monqolustanlı Tsoqbadrax Tseveensurenə “tuş”la uduzub və 5-ci yerlə kifayətlənib.

Kənan Heybətov (70 kq) ilk mərhələdə hindistanlı Maniş Qosvamiyə heç bir şans tanımayıb – 10:0. Ancaq 1/8 finalda rusiyalı İnalbek Şeriyevə müqavimət göstərə bilməyib – 2:13.

Orxan Abasov (79 kq) 1/16 finalda ermənistanlı Arman Avaqyanı mübarizədən kənarlaşdırıb – 4:0. Həmyerlimiz növbəti mərhələdə rusiyalı Maqomed Maqomeyevə 1:7 hesabıyla məğlub olub. Rəqibin finala çıxması Abasov üçün şans yaratsa da, Orxan təsəlliverici görüşdə monqolustanlı Suldxuu Olonbayarla gərgin mübarizədən də məyus ayrılıb – 4:5.

Abubakr Abakarov (92 kq) təsnifat mərhələsində Şimali Makedoniya təmsilçisi Recep Haydaridən güclü olub – 0:10. Ancaq Abakarov ardıcıl 2 titullu rəqiblə görüşdə qələbə arzusunu gerçəkləşdirə bilməyib. Abubakr 1/8 finalda rusiyalı Abdulrəşid Sadullayevə, təsəlliverici görüşdə isə amerikalı Deyvid Teylora eyni hesabla (1:3) məğlub olub.