Maqomedxan Maqomedov dünya ikincisi oldu və Olimpiadaya lisenziya qazandı

Sentyabr 18, 2023

Serbiyanın paytaxtı Belqradda güləş üzrə dünya çempionatı davam edir.

Üçüncü yarış günündə 3 güləşçimiz mübarizəyə qoşulub.

Alyona Kolesnik (59 kq) monqolustanlı Bolortuya Xurelxuuya 6:3 hesabıyla qalib gəlsə də, 1/4 finalda çinli Qi Janqa “tuş”la məğlub olub. Təmsilçimiz təsəlliverici görüşdə macarıstanlı Tamara Dollakı vaxtından əvvəl mübarizədən kənarlaşdırıb – 10:0. Alyona bürünc medal uğrunda qarşılaşmada amerikalı Cenifer Rocersə “tuş”la uduzub və 5-ci yeri tutub. 

Hacı Əliyev (65 kq) ilk 2 mərhələdə çinli Şaohua Yuan (10:4) və avstraliyalı Georgi Okorokov (9:2) üzərində inamlı qələbə qazanıb. Ancaq monqolustanlı Tulqa Tumur Oçirlə görüş gərgin mübarizə şəraitində keçib. Millinin kapitanı sonuncu xal prinsipinə əsasən (3:3) rəqibini məyus edərək 1/4 finala yüksəlib. Ancaq yarımfinalın bir addımlığında ermənistanlı Vazgen Tevanyana uduzub – 2:12.

Maqomedxan Maqomedov (97 kq) əvvəlcə serbiyalı Strahinja Despiçə heç bir şans tanımayıb – 7:0. Yığma üzvü türkiyəli İbrahim Çiftçini də 4:0 hesabıyla üstələyərək adını 1/4 finala yazdırıb. Bu mərhələdə almaniyalı Erik Tileyə “tuş”la qalib gələn Maqomedov yarımfinala adlayıb. Maqomedxan son Avropa çempionatının finalında məğlub olduğu gürcüstanlı Givi Matçaraşvilidən də revanş alıb – 6:1. Beləliklə, dünya çempionatının finalına yüksələn Maqomedov Paris Olimpiadasına lisenziya qazanan ilk güləşçimiz olub. Təmsilçimiz həlledici görüşdə bəhreynli Axmad Tajudinovla qarşılaşıb və rəqibinə “tuş”la uduzaraq gümüş medalla kifayətlənib.