Rumıniyanın paytaxtı Buxarestdə keçirilən güləş üzrə Avropa çempionatına yekun vurulub.

Yarışın son günündə 4 sərbəst güləşçimiz fəxri kürsüyə qalxıb.

Nürəddin Novruzov (61 kq) debütdə Şimali Makedoniyanı təmsil edən Avropa çempionu Vladimir Yeqorovu 8:4 hesabıyla üstələyib. Gəncə güləş məktəbinin yetirməsi daha sonra türkiyəli Nəbi Uzuna tam üstünlüklə (15:4) qalib gələrək 1/4 finala yüksəlib. Nürəddin bu mərhələdə rusiyalı dünya və Avropa çempionu Abasqadji Maqomedovla bacarmayıb – 0:10. Novruzov təsəlliverici görüşdə isveçrəli Nils Leuternə tam üstünlüklə (12:2) və bolqarıstanlı Georgi Vangelova 7:3 hesabıyla qalib gələrək Avropa çempionatında bürünc medal qazanıb.

Turan Bayramov (74 kq) fransalı Zəlimxan Xadjiyevə tam üstünlüklə (11:1) qalib gələrək 1/4 finala yüksəlib. Bayramov moldovalı Vasile Diakonu da xalçadan məyus yola salıb – 4:2. Turan yarımfinalda slovakiyalı Avropa çempionu və dünya ikincisi Taymuraz Salkazanova uduzub – 1:7. Həmyerlimiz ispaniyalı Mohammad Ali Mottaginyaya 4:0 hesabıyla qalib gələrək Avropa çempionatında növbəti dəfə 3-cü yeri tutub.

Arseniy Djioyev (86 kq) israilli Matyu Finesilverə tam üstünlüklə (11:1) qalib gələrək 1/8 finala yüksəlib. O, fransalı Raxim Maqamadovdan da güclü olub – 6:2. Djioyev moldovalı İvan İçizliyəni də mübarizədən kənarlaşdıraraq (11:9) adını yarımfinala yazdırıb. Arseniy finalın bir addımlığında yunanıstanlı Avropa çempionu Dauren Kuruqliyevə minimal fərqlə (1:2) məğlub olub. Təmsilçimiz bürünc medal uğrunda görüşdə əzmkarlıq nümayiş etdirərək rusiyalı Arslan Baqayevə qalib gəlib – 6:4.

Osman Nurmaqomedov (92 kq) 1/8 finalda rusiyalı dünya ikincisi və Avropa çempionu Maqomed Kurbanova 1:5 hesabıyla məğlub oldu.

Georgi Meşvildişvili (125 kq) ermənistanlı Lyova Gevorqyana 5:0 hesabıyla qalib gələrək 1/4 finala yüksəlib. Təmsilçimiz yunanıstanlı Azamat Xosonovla gərgin keçən görüşdə də sevinən tərəf olub – 5:4. Yarımfinalda türkiyəli olimpiya, dünya və Avropa çempionu Taha Akgülə müqavimət göstərə bilməyən (0:10) Meşvildişvili ukraynalı Murazi Mçelidzeyə tam üstünlüklə (10:0) qalib gələrək ötənilki nəticəsini təkrarlayıb və bürünc medalı boynundan asıb.